राज्य शासन ह श्री प्रभात मिश्रा जी ल छत्तीसगढ़ राजभाषा आयोग के अध्यक्ष बनाय हवय। शासन के आदेश निकले के बाद, श्री मिश्रा जी ह आज दिनांक 06 फरवरी 2026 ल सेक्टर 27, नवा रायपुर म स्थित छत्तीसगढ़ राजभाषा आयोग के दफ्तर म अपन पदभार संभालिन।श्री प्रभात मिश्रा जी ह बहुत समय ले राष्ट्रीय स्वयंसेवक संघ ले जुड़े हवंय। वो ह पूर्व प्रांत संघचालक स्व. के.सी. सुदर्शन जी के स्मृति म होने वाला व्याख्यानमाला के आयोजन समिति के पदाधिकारी हवंय। अउ वो अखिल भारतीय साहित्य परिषद के राज्य अध्यक्ष घलो हवंय। एकरे संग-संग वो पहिली हिंद स्वराज शोध पीठ, कुशाभाऊ ठाकरे पत्रकारिता विश्वविद्यालय के अध्यक्ष रह चुके हवंय। साहित्य अऊ पत्रकारिता के छेत्र म काम करे के उनला लंबा अनुभव हवय।श्री मिश्रा जी के पदभार ग्रहण के समय छत्तीसगढ़ राजभाषा आयोग के सचिव डाॅ. अभिलाषा बेहार जी ह पुष्पगुच्छ देके बधाई अऊ शुभकामना दीस। ए अवसर म श्री सतीश मिश्रा, श्री अभय मिश्रा, श्री रोहित साहू, श्री मनीष शर्मा, नारायण चितलंगिया अऊ कार्यालय के सबो कर्मचारी—सुषमा गौराहा, आलोक हेण्डउ, सतीश कश्यप, आदर्श दुबे, सुनयना मार्को, दिनेश पाण्डेय, लोकेन्द्र वर्मा, लामेश्वर उरांव, दीपक लकड़ा अऊ शैलेन्द्र गहरवाल मौजूद रहिन।
